وزیر خزانہ محمد اورنگزیب کی ڈیوس میں اے ڈی بی صدر سے ملاقات

وزیر خزانہ محمد اورنگزیب نے ڈیوس میں ایشیائی ترقیاتی بینک (اے ڈی بی) کے صدر سے اہم ملاقات کی، جس میں پاکستان اور اے ڈی بی کے تعلقات کو نئے اسٹریٹجک مرحلے میں داخل ہونے پر اتفاق کیا گیا۔ اعلامیہ کے مطابق اے ڈی بی کے صدر نے پاکستان کی اقتصادی اصلاحات اور مارکیٹ اعتماد پر اطمینان کا اظہار کیا۔

ملاقات کے دوران وزیر خزانہ نے مہنگائی میں کمی اور معاشی استحکام میں پیش رفت کے حوالے سے اے ڈی بی کو آگاہ کیا۔ دونوں فریقین نے توانائی کے شعبے میں اصلاحات اور صاف توانائی کے فروغ پر اتفاق کیا، جبکہ نجکاری اور نجی شعبے کی شمولیت سے متعلق حکومتی اقدامات پر بھی مثبت پیش رفت ریکارڈ کی گئی۔

اعلامیہ میں کہا گیا کہ اے ڈی بی نے پاکستان کے ساتھ تعاون کے عزم کا اعادہ کیا اور دونوں طرف سے اقتصادی ترقی کے لیے مشترکہ کوششیں جاری رکھنے پر زور دیا گیا۔