وفاقی وزیرِ خزانہ محمد اورنگزیب سے سٹی بینک وفد کی ملاقات، سرمایہ مارکیٹس اور قرضہ جاتی تعاون پر تبادلہ خیال

وفاقی وزیرِ خزانہ محمد اورنگزیب سے سٹی بینک کے وفد نے ملاقات کی، جس میں خودمختار فنانسنگ، مارکیٹ انگیجمنٹ اور پاکستان اور سٹی بینک کے درمیان سرمایہ مارکیٹس اور قرضہ جاتی تعاون پر تفصیلی تبادلہ خیال ہوا۔

وزیرِ خزانہ نے وفد کو عالمی منڈیوں میں پاکستان کی حکمتِ عملی، بین الاقوامی بانڈز کی کارکردگی اور آئندہ بیرونی قرضہ حکمتِ عملی کے بارے میں بریفنگ دی۔ محمد اورنگزیب نے قرضہ جاتی پائیداری اور مناسب قیمت پر فنانسنگ کی اہمیت پر زور دیا اور میڈیم ٹرم نوٹ پروگرامز پر جاری تیاریوں سے وفد کو آگاہ کیا۔

انہوں نے کہا کہ سرمایہ کاروں کے ساتھ فعال رابطہ حکومت کی ترجیح ہے اور پاکستان میں مثبت پورٹ فولیو سرمایہ کاری کا خیرمقدم کیا جاتا ہے۔ وزیرِ خزانہ نے عالمی بینکوں کی سینئر سطح پر مستقل شمولیت اور معاشی اصلاحات میں ان کے کردار کی اہمیت پر بھی روشنی ڈالی۔ ملاقات کے دوران حکومت اور سٹی بینک کے درمیان تعاون کے فروغ پر اتفاق کیا گیا۔