وزیرِ خزانہ محمد اورنگزیب کی سعودی ہم منصب سے ملاقات، دوطرفہ تعلقات اور معاشی پیش رفت پر تبادلۂ خیال

وفاقی وزیرِ خزانہ محمد اورنگزیب نے ورلڈ اکنامک فورم 2026 کے موقع پر سعودی عرب کے وزیر خزانہ سے ملاقات کی۔ ملاقات کے دوران دونوں رہنماؤں نے دوطرفہ تعلقات، پاکستان کی معاشی پیش رفت، اور دیرینہ اقتصادی شراکت داری کو مزید مضبوط بنانے کے امکانات پر تفصیلی تبادلۂ خیال کیا۔

سعودی وزیر خزانہ نے پاکستان میں حالیہ معاشی بہتری پر اطمینان کا اظہار کیا، جبکہ وزیر خزانہ نے دونوں ممالک کے درمیان مضبوط اور دیرینہ تعلقات کو اجاگر کیا اور سعودی عرب کے مسلسل اور بھرپور تعاون پر شکریہ ادا کیا۔

وزیرِ خزانہ نے بتایا کہ پاکستان کی معیشت استحکام اور ترقی کی راہ پر گامزن ہے، زرمبادلہ کے ذخائر میں بہتری اور درآمدات کے لیے تقریباً تین ماہ کا کور موجود ہے۔ اس کے علاوہ کیپٹل مارکیٹ میں ایک لاکھ بیس ہزار سے زائد نئے سرمایہ کار شامل ہوئے، اور شرحِ سود میں کمی کا رجحان شروع ہو چکا ہے۔

حکومت کا فوکس مستحکم کرنٹ اکاؤنٹ اور پائیدار معاشی ترقی پر ہے، اور مانیٹری پالیسی کے فیصلے اسٹیٹ بینک کی خودمختاری کے تحت کیے جاتے ہیں۔