وزیرِ خزانہ محمد اورنگزیب کی امریکی ڈی ایف سی وفد سے ملاقات: زراعت، توانائی اور معدنیات میں تعاون کا اعادہ

وفاقی وزیرِ خزانہ و محصولات سینیٹر محمد اورنگزیب نے یو ایس انٹرنیشنل ڈویلپمنٹ فنانس کارپوریشن (ڈی ایف سی) کے نمائندوں سے اہم ملاقات کی ہے۔ ملاقات کے دوران وزیرِ خزانہ نے توانائی، آئی ٹی، انفراسٹرکچر، معدنیات، خوراک اور زراعت جیسے اہم شعبہ جات میں ڈی ایف سی کے بھرپور تعاون کی خواہش کا اظہار کیا۔ انہوں نے ڈی ایف سی کی جانب سے بندرگاہوں، ٹیلی کمیونیکیشن، دواسازی اور سپلائی چین جیسے شعبوں میں دلچسپی کو حکومتِ پاکستان کی ترجیحات سے ہم آہنگ قرار دیا۔ سینیٹر محمد اورنگزیب نے ڈی ایف سی کی ٹیم کو پاکستان کا دورہ کرنے، قابلِ عمل منصوبوں کی نشاندہی کرنے اور متعلقہ شراکت داروں کے ساتھ مل کر بزنس پلان مرتب کرنے کی باضابطہ دعوت بھی دی۔