وفاقی وزیرِ خزانہ محمد اورنگزیب کی ہنی ویل ٹیکنالوجیز کے وفد سے ملاقات، ریفائنری ماڈرنائزیشن اور توانائی کے شعبے پر تبادلہ خیال

وفاقی وزیر برائے خزانہ و محصولات سینیٹر محمد اورنگزیب نے واشنگٹن ڈی سی میں ‘ہنی ویل ٹیکنالوجیز’ (Honeywell Technologies) کے ایک اعلٰی سطح کے وفد سے ملاقات کی، جس کی قیادت وائس پریذیڈنٹ اور جنرل منیجر بیری گلک مین کر رہے تھے۔ ملاقات کے دوران، وزیرِ خزانہ نے پاکستان کے ریفائنری سیکٹر کو جدید بنانے اور اس کی توسیع کے حوالے سے ہنی ویل کی مجوزہ تجاویز کا خیرمقدم کیا۔ انہوں نے کہا کہ اس اقدام سے ملک کی مقامی ریفائننگ صلاحیت میں اضافہ ہوگا جبکہ درآمدی پیٹرولیم مصنوعات پر انحصار کو کم کرنے میں مدد ملے گی۔

اس موقع پر ہنی ویل کے جدید ترین آلات اور تکنیکی حل کے ساتھ ساتھ یو ایس ایگزٹ بینک (U.S. EXIM Bank)، یو ایس انٹرنیشنل ڈویلپمنٹ فنانس کارپوریشن (DFC)، ایکسپورٹ کریڈٹ ایجنسیوں اور معروف بین الاقوامی بنکوں کے ذریعے ممکنہ مالی معاونت پر بھی تفصیلی تبادلہ خیال کیا گیا۔ وزیرِ خزانہ نے زور دے کر کہا کہ یہ مجوزہ منصوبہ پاکستان کی توانائی کی سیکیورٹی، صنعتی ترقی اور پائیدار اقتصادی نمو کے لیے سنگِ میل ثابت ہوگا۔