ایف آئی اے کی کارروائی، جعلی شناختی کارڈ نیٹ ورک کے 3 ملزم گرفتار

فیڈرل انویسٹی گیشن ایجنسی (ایف آئی اے) سرگودھا نے بھلوال نادرا آفس میں ایک بڑی کارروائی کرتے ہوئے غیر ملکیوں کو جعلی شناختی کارڈز جاری کرنے والے نیٹ ورک کے تین مرکزی ملزمان کو گرفتار کر لیا ہے۔ ایف آئی اے حکام کے مطابق گرفتار ملزمان میں نادرا کے سابق اسسٹنٹ ڈائریکٹر، سابق ڈیٹا انٹری آپریٹر (ڈی ای او) اور ایک سابق اہلکار شامل ہیں، جنہیں مقدمے میں نامزد کیا گیا تھا۔ ابتدائی تحقیقات میں انکشاف ہوا ہے کہ ملزمان نے اپنے اختیارات کا ناجائز استعمال کرتے ہوئے تین افغان شہریوں کو جعلی کوائف کی بنیاد پر پاکستانی خاندانوں کے فیملی ٹری (شجرہ نسب) میں شامل کیا، جس کے بعد انہیں نا جائز طور پر پاکستانی شناختی دستاویزات جاری کی گئیں۔ ایف آئی اے کا کہنا ہے کہ گرفتار ملزمان کے خلاف مقدمہ درج کر کے مزید قانونی کارروائی اور باریک بینی سے تحقیقات شروع کر دی گئی ہیں۔