مفت عمرہ کا جھانسہ دے کر آئس سعودی عرب اسمگل کرنے والا مرکزی اشتہاری گرفتار

ایف آئی اے فیصل آباد نے ایک کامیاب کارروائی کرتے ہوئے بے گناہ زائرین کو مفت عمرہ کروانے کا لالچ دے کر سعودی عرب منشیات اسمگل کرنے والے گینگ کے مرکزی اشتہاری ملزم گل نواز کو پشاور سے گرفتار کر لیا ہے۔ ایف آئی اے تھانہ فیصل آباد کے ایس ایچ او سب انسپکٹر اجمل حسین کی سربراہی میں ٹیم نے پشاور میں چھاپہ مار کر ایک سال سے روپوش اس ملزم کو قابو کیا، جسے اب فیصل آباد منتقل کر کے تفتیش کا آغاز کر دیا گیا ہے جبکہ کیس میں نامزد دو دیگر ملزمان پہلے ہی پولیس کی تحویل میں ہیں۔

تحقیقات کے مطابق اس گینگ نے ستمبر 2024 میں جڑاں والا کے 5 رہائشیوں—جن میں تین خواتین زیارت بی بی، انور بی بی، شمیم بی بی، ایک مسجد کے امام ریاض اور نیر عباس شامل تھے—کو مفت عمرے کا جھانسہ دیا اور چالاکی سے ان کے سامان میں تحائف کے پیکٹوں کی آڑ میں آئس (منشیات) چھپا دی۔ جدہ ایئرپورٹ پہنچنے پر سعودی حکام نے انکشاف ہونے پر ان پانچوں بے گناہ افراد کو گرفتار کر لیا تھا، جنہیں بعد ازاں مقامی عدالت سے عمر قید کی سزا سنائی گئی اور وہ اس وقت سعودی جیل میں قید ہیں۔ حکومتِ پاکستان ان بے گناہ زائرین کی جلد رہائی اور وطن واپسی کے لیے سفارتی سطح پر اقدامات کر رہی ہے۔