وفاقی وزیر بحری امور کی بنگلہ دیشی ہم منصب سے ملاقات،میری ٹائم تعاون بڑھانے پر اتفاق

وفاقی وزیر بحری امور جنید انوار چودھری نے لندن میں بنگلہ دیش کے مشیرِ شپنگ سے ملاقات کی، جس میں پاکستان اور بنگلہ دیش کے درمیان اقتصادی شراکت داری اور میری ٹائم تعاون کو بڑھانے پر تبادلہ خیال کیا گیا۔

جنید انوار چودھری نے پاکستان بنگلہ دیش شپنگ فریم ورک کی تجویز پیش کی اور دونوں ممالک کے عالمی میری ٹائم پالیسی میں مؤثر کردار ادا کرنے کی صلاحیت پر زور دیا۔ ملاقات میں مشترکہ شپنگ سروسز، تکنیکی تربیت اور میری ٹائم سیفٹی میں تعاون کو فروغ دینے پر اتفاق کیا گیا۔وزیر بحری امور نے کہا کہ سمندری شعبے میں تعاون کے جامع منصوبے پر مشاورت کی گئی ہے اور پاکستان کی آئی ایم او کیٹیگری سی انتخابات میں بنگلہ دیش کی حمایت کی درخواست کی گئی۔ انہوں نے زور دیا کہ آئی ایم او اور علاقائی فورمز پر دوطرفہ تعاون بڑھانا ناگزیر ہے۔ملاقات میں بنگلہ دیشی کارگو کے لیے کراچی پورٹ کی سہولتیں فراہم کرنے کی پیشکش بھی کی گئی۔ وفاقی وزیر نے پاکستان–بنگلہ دیش میری ٹائم ڈائیلاگ کی تجویز دی، جس میں پورٹس، شپنگ اور بلیو اکانومی کے موضوعات شامل ہیں۔جنید انوار چودھری نے کہا کہ پائیدار میری ٹائم شراکت داری خطے میں استحکام اور خوشحالی لانے میں اہم کردار ادا کر سکتی ہے۔