پاکستان، سری لنکا کا گندھارا تہذیب اور بدھ مت کے ورثے کے فروغ کیلئے تعاون بڑھانے پر اتفاق

وفاقی وزیر برائے قومی ورثہ و ثقافت اورنگزیب خان کھچی سے سری لنکا کے 16 رکنی اعلیٰ سطح کے بدھ مت وفد نے اسلام آباد میں ایک اہم ملاقات کی، جس میں پاکستان اور سری لنکا کے درمیان تاریخی گندھارا تہذیب، بدھ مت کے نوادرات اور آثارِ قدیمہ کے شعبوں میں باہمی تعاون کو مزید وسیع کرنے پر کامل اتفاق کیا گیا۔

وفاقی وزیر اورنگزیب خان کھچی نے وفد کو خوش آمدید کہتے ہوئے کہا کہ پاکستان گندھارا تہذیب اور بدھ مت کے تاریخی و مذہبی ورثے کا ایک انتہائی اہم عالمی مرکز ہے اور موجودہ حکومت اپنے اس نایاب تاریخی و تہذیبی ورثے کو عالمی سطح پر اجاگر کرنے کے لیے مکمل طور پر پرعزم ہے۔ انہوں نے زور دیا کہ تعلیمی تبادلوں، مشترکہ سائنسی تحقیق اور ثقافتی سفارت کاری کے ذریعے پاکستان اور سری لنکا کے صدیوں پر محیط دوطرفہ تعلقات کو نئی بلندیوں تک پہنچایا جا سکتا ہے۔

اس پیش رفت کے تناظر میں ہزارہ یونیورسٹی پاکستان اور ناگنندا انٹرنیشنل بدھسٹ یونیورسٹی سری لنکا کے درمیان ایک تاریخی مفاہمتی یادداشت (MoU) پر بھی دستخط کیے گئے، جس کے تحت دونوں اعلیٰ تعلیمی اداروں کے درمیان اساتذہ و طلبہ کے تبادلوں اور بدھ مت کے مطالعات میں تعاون کو فروغ دیا جائے گا۔ سری لنکن وفد نے اسلام آباد میوزیم کا تفصیلی دورہ کر کے نایاب آثار میں گہری دلچسپی کا اظہار کیا، جبکہ وفد میں شامل معروف سری لنکن ٹی وی میزبان چتھورا الوِس پاکستان کی گندھارا تہذیب پر 8 اقساط پر مشتمل خصوصی ڈاکومینٹری سیریز بھی تیار کریں گے۔ یہ وفد اپنے 8 روزہ دورے کے دوران ٹیکسلا، تخت بھائی، پشاور اور سوات کے تاریخی و مذہبی مقامات کی زیارت کرے گا جہاں سوات یونیورسٹی کے ساتھ بھی تعلیمی و تحقیقی معاہدے متوقع ہیں۔