وفاقی حکومت کا کفایت شعاری اقدامات جاری رکھنے کا فیصلہ

وفاقی حکومت نے سرکاری اخراجات پر قابو پانے کے لیے رواں مالی سال میں بھی سخت کفایت شعاری اقدامات جاری رکھنے کا حتمی فیصلہ کر لیا ہے۔ وفاقی کابینہ سے باقاعدہ منظوری کے بعد کابینہ ڈویژن نے عملدرآمد کے لیے وزارتِ خزانہ کو مراسلہ ارسال کر دیا ہے۔ فیصلے کے تحت گزشتہ 3 سال سے خالی تمام سرکاری آسامیوں کو ختم کر دیا جائے گا جبکہ نئی اسامیوں کی تخلیق، ہر قسم کی گاڑیوں اور مشینری و آلات کی خریداری پر پابندی برقرار رہے گی۔ اس کے علاوہ سرکاری خرچ پر بیرونِ ملک علاج اور غیر ضروری غیر ملکی دوروں پر عائد مکمل قدغن بھی بدستور نافذ العمل رہے گی۔ ذرائع کے مطابق ان فیصلوں کا باقاعدہ نوٹیفکیشن وزارتِ خزانہ کی جانب سے جلد جاری کر دیا جائے گا۔