ٹیکس نظام میں اصلاحات: ایف بی آر کا نیشنل فیس لیس سینٹر قائم

فیڈرل بورڈ آف ریونیو (ایف بی آر) نے ٹیکس نظام میں انقلابی اصلاحات کے تحت اسلام آباد میں ‘نیشنل فیس لیس سینٹر’ قائم کر دیا ہے۔ ایف بی آر کے مطابق اس نئے اور جدید نظام کا بنیادی مقصد ٹیکس دہندہ اور ٹیکس افسر کے درمیان براہِ راست رابطے اور تحکم کو مکمل طور پر ختم کرنا ہے۔ کیسز کا انتخاب کمپیوٹرائزڈ اور رسک بیسڈ ڈیٹا کی بنیاد پر خودکار طریقے سے کیا جائے گا، جس کے تحت ملک بھر کے افسران کو بلا تفریق کیسز تفویض ہوں گے اور ٹیکس دہندہ کو اپنے کیس پر تعینات افسر کی شناخت سے آگاہ نہیں کیا جائے گا۔

حکام نے واضح کیا ہے کہ کسی بھی افسر کو کیس کے انتخاب یا التوا کا انفرادی اختیار نہیں ہوگا۔ ہر کیس آڈٹ، اسیسمنٹ اور کوالٹی کنٹرول جیسے تین سخت مراحل سے گزرے گا۔ اس جدید نظام کے تحت تمام نوٹسز، جوابات اور سماعتیں مکمل طور پر الیکٹرانک طریقے سے ایف بی آر کے آئی آر ایس (IRS) سسٹم کے ذریعے انجام پائیں گی، جبکہ فیلڈ تصدیق کے لیے الگ ٹیمیں متحرک رہیں گی۔ فنانس ایکٹ 2026 کے تحت قانونی تحفظ حاصل کرنے والے اس سینٹر کی سربراہی چیف کمشنر ان لینڈ ریونیو کریں گے، جس سے ٹیکس کے نظام میں شفافیت اور یکسانیت آئے گی۔