فاف ڈو پلیسی کا بڑا فیصلہ: آئی پی ایل کو خیرباد، پی ایس ایل 11 میں شرکت کی تصدیق

سابق جنوبی افریقی کپتان فاف ڈو پلیسی نے 14 برس کی وابستگی کے بعد آئندہ آئی پی ایل ایڈیشن میں شرکت نہ کرنے کا اعلان کر دیا ہے، جب کہ وہ پی ایس ایل سیزن 11 کے لیے اپنی دستیابی کی تصدیق کر چکے ہیں۔

آئی پی ایل کا اگلا ایڈیشن 2026 میں ٹی ٹوئنٹی ورلڈ کپ کے بعد شیڈول ہے۔ ذرائع کے مطابق فاف ڈو پلیسی نے رواں برس آئی پی ایل نیلامی میں حصہ نہ لینے اور نیا چیلنج قبول کرتے ہوئے پی ایس ایل میں کھیلنے کا فیصلہ کیا ہے۔

انہوں نے یہ فیصلہ انسٹاگرام پر ایک جذباتی پوسٹ کے ذریعے شیئر کیا، جس میں آئی پی ایل کے 14 سیزن کے تجربات اور اس کے اپنے کیریئر پر گہرے اثرات کا ذکر کیا۔

فاف ڈو پلیسی کا کہنا تھا کہ ’’آئی پی ایل کے ساتھ سفر ناقابلِ فراموش تھا، مگر اس بار میں نے نئی راہیں تلاش کرنے کا فیصلہ کیا ہے، اور اسی لیے پی ایس ایل کے نئے سیزن میں شرکت کرنے جا رہا ہوں۔‘‘