یورپ میں قدرتی گیس کی قیمتیں 3 سال کی بدترین سطح پر پہنچ گئیں

یورپ میں توانائی کا بحران شدت اختیار کر گیا ہے، جہاں قدرتی گیس کی قیمتیں 80 یورو فی میگاواٹ آور سے تجاوز کر گئی ہیں جو کہ 2023ء کے بعد بلند ترین سطح ہے۔ عرب میڈیا کے مطابق یہ تشویشناک اعداد و شمار یورپی گیس کی قیمتوں کے لیے بنیادی بینچ مارک سمجھی جانے والی ڈچ ہول سیل مارکیٹ ٹی ٹی ایف (Dutch TTF) نے جاری کیے ہیں۔ گیس کی قیمتوں میں یہ حالیہ اور اچانک ترین اضافہ یورپ کے لیے انتہائی تشویش کا باعث بنا ہوا ہے، کیونکہ براعظم میں موسمِ سرما کا آغاز قریب ہے اور اس دوران گھروں کو گرم رکھنے اور صنعتی ضروریات کے لیے توانائی کی طلب میں غیر معمولی اضافہ ہو جاتا ہے۔

علاقائی ماہرین کے مطابق یورپی خطے میں اس وقت گیس کے اجتماعی ذخائر پہلے ہی انتہائی کم سطح پر موجود ہیں۔ مشرقِ وسطیٰ میں امریکہ اور اسرائیل کی ایران کے ساتھ جاری جنگ و کشیدگی کے باعث عالمی سطح پر سپلائی چین شدید متاثر ہوئی ہے اور توانائی کے بحران کے بادل گہرے ہوئے ہیں۔ اسی خطرے کے پیشِ نظر یورپی یونین کے رکن ممالک کو رواں سال مارچ میں ہی تنبیہ جاری کر دی گئی تھی کہ وہ موسمِ سرما کی شدید ضروریات کو پورا کرنے کے لیے قبل از وقت گیس کا ذخیرہ کرنا شروع کر دیں، تاہم سپلائی میں تعطل کے باعث صورتحال نازک موڑ اختیار کر چکی ہے۔