مظاہرین پر تشدد، یورپی یونین کا ایران پر اضافی پابندیوں پر غور

تہران: یورپی یونین نے ایران میں مظاہرین کے خلاف حکومت کے پُرتشدد اقدامات کے بعد اضافی پابندیاں عائد کرنے پر غور شروع کر دیا ہے۔

یورپی یونین کے ترجمان انور العنونی کا کہنا ہے کہ انسانی حقوق کی صورتحال پر گہری نظر رکھی جا رہی ہے اور مظاہرین کے خلاف تشدد ناقابل قبول ہے، جس کے باعث مزید پابندیوں کا امکان ہے۔

دوسری جانب ایران کے مختلف شہروں میں حکومت کے حق میں ریلیاں نکالی گئیں۔ تہران کے مرکزی انقلاب چوک پر ہزاروں شہری جمع ہوئے اور حکومت کے ساتھ یکجہتی کا اظہار کیا۔ مظاہرین نے غیر ملکی حمایت یافتہ فسادات کی مخالفت کی اور سیکیورٹی فورسز کی حمایت کا اعادہ کیا۔

ایرانی حکومت کا مؤقف ہے کہ ملک میں ہونے والے فسادات بیرونی مداخلت کا نتیجہ ہیں، جبکہ یورپی یونین سمیت مغربی ممالک انسانی حقوق کی خلاف ورزیوں کے الزامات عائد کر رہے ہیں۔