اسرائیل ’اسلام آباد ایم او یو‘ کو سبوتاژ کرنے کی کوشش کر رہا ہے، اردوان

ترکیہ کے صدر رجب طیب اردوان نے دنیا کو خبردار کیا ہے کہ اسرائیل، امریکہ اور ایران کے درمیان حال ہی میں طے پانے والی تاریخی ‘اسلام آباد مفاہمتی یادداشت’ (MoU) کو سبوتاژ کرنے کی سرتوڑ کوششیں کر رہا ہے۔

استنبول میں دورے پر آئے ہوئے وزیر اعظم پاکستان شہباز شریف کے ہمراہ ایک مشترکہ پریس کانفرنس سے خطاب کرتے ہوئے ترک صدر نے سب سے پہلے وزیر اعظم پاکستان کو ترکیہ آمد پر خوش آمدید کہا۔ انہوں نے بلوچستان میں ہونے والے حالیہ افسوسناک بس حادثے پر گہرے دکھ کا اظہار کرتے ہوئے قیمتی جانوں کے ضیاع پر دلی افسوس اور تعزیت کا اظہار کیا۔

پریس کانفرنس کے دوران صدر رجب طیب اردوان نے ‘اسلام آباد ایم او یو’ پر دستخط کا بھرپور خیر مقدم کیا اور خطے میں امن کے قیام کے لیے پاکستان کے کلیدی کردار کی تعریف کی۔ تاہم، انہوں نے عالمی برادری کو متوجہ کرتے ہوئے کہا کہ اسرائیل اس تاریخی معاہدے کو ناکام بنانے کے لیے مسلسل جارحیت پر اتر آیا ہے اور اسرائیلی افواج کی جانب سے غزہ اور لبنان میں کی جانے والی حالیہ کارروائیاں اسی سلسلے کی کڑی ہیں، جن پر ترکیہ کی گہری نظر ہے۔

انہوں نے مزید کہا کہ پاکستان اور ترکیہ کے مابین برادرانہ تعلقات اور تعاون کی رفتار انتہائی اطمینان بخش ہے۔ عالمی امن کے استحکام کے لیے اسلام آباد مفاہمتی یادداشت کو انتہائی اہم قرار دیتے ہوئے انہوں نے یقین دلایا کہ ترکیہ ہر شعبے میں پاکستان کی بھرپور حمایت جاری رکھے گا۔

ترک صدر کا کہنا تھا کہ امن، ترقی اور خوشحالی کے لیے پاکستان کے اقدامات قابلِ ستائش ہیں۔ انہوں نے بتایا کہ وزیر اعظم شہباز شریف کے ساتھ ملاقات میں تجارت، سرمایہ کاری اور اقتصادی تعاون میں اضافے پر تفصیلی گفتگو ہوئی ہے۔ انہوں نے واضح کیا کہ خصوصی اقتصادی زونز (CEZ) کے معاملے پر دونوں ممالک کی متعلقہ وزارتیں قریبی روابط برقرار رکھیں گی اور ترکیہ کی بزنس کمیونٹی کو پاکستان میں سرمایہ کاری کے لیے بھرپور ترغیب دی جائے گی