اسلام آباد بلدیاتی انتخابات: کاغذاتِ نامزدگی کی جانچ پڑتال کل سے شروع ہوگی، چیف الیکشن کمشنر کا فول پروف سیکیورٹی کا حکم

چیف الیکشن کمشنر سکندر سلطان راجہ کی صدارت میں الیکشن کمیشن کا خصوصی اجلاس منعقد ہوا جس میں اسلام آباد میں بلدیاتی انتخابات کے انتظامات کا تفصیلی جائزہ لیا گیا۔ بریفنگ میں بتایا گیا کہ بلدیاتی انتخابات کے لیے مجموعی طور پر 3505 امیدواروں نے کاغذاتِ نامزدگی جمع کرائے ہیں، جن میں 110 خواتین امیدوار بھی شامل ہیں، جبکہ کاغذات کی جانچ پڑتال کا عمل کل 11 نومبر سے باقاعدہ شروع ہو گا۔ الیکشن کمیشن نے انتخابی مٹیریل کی خریداری اور بیلٹ پیپرز کی پرنٹنگ کے تمام انتظامات مکمل کر لیے ہیں۔ اجلاس میں ایس ایس پی آپریشنز نے بتایا کہ انتخابات کے پُرامن انعقاد کے لیے 15 ہزار پولیس اہلکار تعینات کیے جائیں گے اور اضافی نفری پنجاب سے طلب کی جائے گی۔ چیف الیکشن کمشنر نے انتخابی ضابطہ اخلاق پر سختی سے عملدرآمد کرانے، سیکیورٹی اور ٹرانسپورٹ پلان کی بروقت فراہمی اور شفاف انتخابات یقینی بنانے کی ہدایت جاری کی ہے۔