“ایل نینو”کا خطرہ : دنیا کو شدید موسم سے نمٹنے کیلئےاقدامات کرنے ہوں گے، اقوام متحدہ

اقوام متحدہ نے خبردار کیا ہے کہ آنے والے مہینوں میں دنیا کو شدید موسمی تبدیلیوں کا سامنا کرنا پڑ سکتا ہے کیونکہ موسمی نظام ایل نینو کے بننے کے امکانات میں اضافہ ہو گیا ہے۔

اقوام متحدہ کے مطابق جون سے اگست کے دوران اس نظام کے فعال ہونے کا امکان ہے جبکہ سمندری درجہ حرارت میں غیر معمولی اضافہ دیکھا جا رہا ہے۔ رپورٹ کے مطابق سمندروں کا درجہ حرارت چھ درجے تک بڑھ چکا ہے، جس کے باعث ایل نینو کے جنم لینے کے امکانات نوے فیصد تک پہنچ گئے ہیں۔

ماہرین کے مطابق اس موسمی نظام کے باعث دنیا بھر میں کہیں شدید گرمی اور کہیں غیر معمولی بارشیں ہو سکتی ہیں، جس سے مختلف خطوں میں موسمی بحران پیدا ہونے کا خدشہ ہے۔

اقوام متحدہ کے سیکرٹری جنرل انتونیو گوتریس نے کہا ہے کہ دنیا کو اس چیلنج سے نمٹنے کے لیے فوری اور مؤثر اقدامات کرنا ہوں گے، کیونکہ صورتحال تیزی سے سنگین ہو رہی ہے۔

انہوں نے زور دیا کہ عالمی سطح پر روایتی ایندھن کے بجائے قابلِ تجدید توانائی کے ذرائع اپنانا وقت کی اہم ضرورت ہے۔

اقوام متحدہ کے مطابق یہ موسمی صورتحال نومبر تک برقرار رہنے کا امکان ہے۔