کنٹونمنٹ بورڈز میں بلدیاتی انتخابات، الیکشن کمیشن نے فیصلہ محفوظ کر لیا

الیکشن کمیشن آف پاکستان نے کنٹونمنٹ بورڈز میں بلدیاتی انتخابات کے انعقاد سے متعلق کیس کی سماعت کے بعد فیصلہ محفوظ کر لیا ہے۔ چیف الیکشن کمشنر سکندر سلطان راجہ کی سربراہی میں پانچ رکنی بینچ نے کیس کی سماعت کی، جس میں وزارتِ دفاع کے حکام اور قانونی مشیر پیش ہوئے۔ سماعت کے دوران وزارتِ دفاع نے بتایا کہ انتخابات کی تاریخ کے حوالے سے وفاقی حکومت کو مراسلہ بھیجا گیا ہے جس کا جواب موصول نہیں ہوا، جبکہ دو کنٹونمنٹ بورڈز کی حلقہ بندیاں جنوری 2027 تک مکمل کرنے کی مہلت مانگی گئی۔ چیف الیکشن کمشنر نے مسلسل تاخیر پر شدید برہمی کا اظہار کرتے ہوئے ریمارکس دیے کہ الیکشن ملتوی کرنے کی کوئی منطقی وجہ نہیں ہے اور جن علاقوں میں حلقہ بندیاں مکمل ہیں وہاں فوری انتخابات کرائے جا سکتے ہیں۔ تمام فریقین کے موقف کے بعد کمیشن نے کیس کا فیصلہ محفوظ کر لیا۔