خیبرپختونخوا حکومت کی بلدیاتی قانون سے متعلق ترمیم مسترد

الیکشن کمیشن آف پاکستان نے خیبرپختونخوا حکومت کی جانب سے بلدیاتی قانون میں کی جانے والی حالیہ ترمیم کو آئین سے متصادم قرار دیتے ہوئے مسترد کر دیا ہے اور اس سلسلے میں چیف سیکرٹری کے پی کو خط ارسال کر دیا ہے۔ الیکشن کمیشن کے مطابق نئی ترمیم میں ویلج کونسل کی آبادی کی حد 30 ہزار سے 40 ہزار مقرر کی گئی ہے، جس کے باعث نہ صرف حلقہ بندی کا عمل ناممکن ہو گیا ہے بلکہ بلدیاتی انتخابات میں تاخیر کا بھی شدید خدشہ پیدا ہو گیا ہے۔ خط میں واضح کیا گیا ہے کہ آئین کی رو سے الیکشن کمیشن کے آئینی اختیارات کو کم نہیں کیا جا سکتا اور حلقہ بندیاں کرنا صرف اور صرف الیکشن کمیشن کا اختیار ہے۔ الیکشن کمیشن نے یہ موقف بھی اپنایا کہ آبادی کی نئی حد سے موجودہ کونسلز کی تعداد کے حوالے سے سنگین قانونی ابہام پیدا ہو چکا ہے۔