الیکشن کمیشن نے سیاسی جماعتوں سے مالی گوشوارے طلب کر لیے

الیکشن کمیشن آف پاکستان (ای سی پی) نے تمام رجسٹرڈ سیاسی جماعتوں کو ہدایت کی ہے کہ وہ مالی سال 2025-26 کے سالانہ مالی گوشوارے 29 اگست 2026 تک لازمی جمع کرائیں۔ الیکشن کمیشن کے مطابق یہ تفصیلات مقررہ ‘فارم-ڈی’ پر جمع کرائی جائیں گی، جس کے ساتھ چارٹرڈ اکاؤنٹنٹ کی آڈٹ رپورٹ اور پارٹی سربراہ کا یہ تصدیقی سرٹیفکیٹ منسلک ہونا ضروری ہے کہ جماعت نے کوئی ممنوعہ فنڈنگ حاصل نہیں کی ہے۔ ای سی پی نے واضح کیا ہے کہ فارم-ڈی میں کسی قسم کی اوور رائٹنگ قبول نہیں کی جائے گی اور جماعتوں کو 1 جولائی 2025 سے 30 جون 2026 تک کی بینک اسٹیٹمنٹس بھی پیش کرنا ہوں گی۔ ترجمان کے مطابق تمام مالی گوشوارے بذاتِ خود سیکرٹری الیکشن کمیشن کے دفتر میں جمع کرانا ہوں گے، جبکہ بذریعہ ڈاک، فیکس یا کوریئر موصول ہونے والی درخواستیں مسترد کر دی جائیں گی۔