پاکستان سمیت دنیا بھر میں مسیحی برادری آج ایسٹر کا تہوار منا رہی ہے

پاکستان سمیت دنیا بھر میں مسیحی برادری آج ایسٹر کا مذہبی تہوار عقیدت و احترام سے منا رہی ہے، جس کے لیے گرجا گھروں میں خصوصی دعائیہ تقریبات کا اہتمام کیا گیا ہے۔

ملک بھر کے چرچز میں عبادات کے دوران ملکی سلامتی، امن اور خوشحالی کے لیے خصوصی دعائیں کی جا رہی ہیں، جبکہ مسیحی برادری اس دن کو روحانی تجدید اور امید کی علامت کے طور پر مناتی ہے۔

اس موقع پر صدر آصف علی زرداری اور وزیراعظم محمد شہباز شریف نے مسیحی برادری کو دلی مبارک باد پیش کی ہے۔

صدر مملکت نے اپنے پیغام میں کہا کہ یہ دن ہمدردی، امید، تجدید اور اچھائی کی برائی پر فتح کا پیغام دیتا ہے۔ انہوں نے کہا کہ مسیحی برادری ملک کے مختلف شعبوں بشمول تعلیم، صحت، سرکاری اداروں اور مسلح افواج میں نمایاں خدمات انجام دے رہی ہے اور پاکستان میں انہیں قدر و احترام کی نگاہ سے دیکھا جاتا ہے۔