امارات کے نائب صدر 77 ویں سالگرہ منانے اسکاٹ لینڈ میں اپنی دلکش اراضی میں پہنچ گئے

دبئی کے حکمراں اور متحدہ عرب امارات کے نائب صدر شیخ محمد بن راشد آل مکتوم 15 جولائی کو ہونے والی اپنی 77 ویں سالگرہ منانے کے لیے اسکاٹ لینڈ پہنچ گئے ہیں۔ برطانوی میڈیا کے مطابق، یو اے ای کے نائب صدر اپنے نجی طیارے کے ذریعے انورنیس ایئرپورٹ پہنچے، جہاں سے وہ 3 ہیلی کاپٹرز اور رینج روورز، مرسیڈیز اور سیکیورٹی گاڑیوں سمیت تقریباً 60 گاڑیوں پر مشتمل ایک بڑے قافلے کے ساتھ اپنے نجی اسٹیٹ “انویرینیٹ اسٹیٹ” روانہ ہوئے۔ یہ تاریخی اسٹیٹ 63 ہزار ایکڑ پر محیط ہے جو اسکاٹ لینڈ کے خوبصورت پہاڑی علاقے لوخ ڈوئچ کے کنارے واقع ہے اور 3 ہیلی پیڈز، متعدد رہائشی عمارتوں اور مہمان خانوں پر مشتمل ہے۔ مقامی رہائشیوں نے علاقے میں اتنے بڑے شاہی و سکیورٹی قافلے کی آمد کو پہلی بار دیکھنے کا تجربہ قرار دیا۔ شیخ محمد بن راشد گزشتہ کئی دہائیوں سے گرمیوں کے موسم میں اسکاٹ لینڈ کی اس پسندیدہ رہائش گاہ کا رخ کرتے ہیں جہاں وہ قدرتی حسن، شکار، گھڑسواری اور پرسکون ماحول میں وقت گزارنا پسند کرتے ہیں۔ واضح رہے کہ جدید دبئی کے معمار کے طور پر معروف شیخ محمد بن راشد کی قیادت میں برج خلیفہ اور امارات ایئرلائن جیسے دنیا کے چند بڑے اور تاریخی منصوبے مکمل ہوئے ہیں۔