دھماکوں کی خبروں کے بعد دبئی حکومت کا میڈیا کیلئے سخت انتباہ

دبئی حکومت نے شہر سے متعلق غیر مصدقہ، افواہیں یا جھوٹی خبریں نشر اور شائع کرنے والے میڈیا ہاؤسز اور اداروں کے خلاف سخت قانونی کارروائی کا انتباہ جاری کر دیا ہے۔ خبر رساں ایجنسی کے مطابق دبئی حکومت کا یہ ہنگامی بیان ایک ایسے وقت میں سامنے آیا ہے جب حال ہی میں ایک برطانوی خبر رساں ادارے نے دبئی کے مرکزی علاقے میں دھماکوں جیسی آوازیں سنے جانے کی غیر مصدقہ اطلاع دی تھی۔

دبئی میڈیا آفس نے سوشل میڈیا پلیٹ فارم ایکس (ٹویٹر) پر جاری کردہ اپنے آفیشل بیان میں واضح کیا ہے کہ دبئی سے متعلق کسی بھی قسم کی جھوٹی یا غیر تصدیق شدہ معلومات شائع کرنے والے میڈیا اداروں کے خلاف مقامی اور وفاقی قوانین کے تحت سخت ترین قانونی اقدامات اٹھائے جائیں گے۔ بیان میں تمام ملکی و بین الاقوامی میڈیا اداروں پر زور دیا گیا ہے کہ وہ کسی بھی خبر کی اشاعت سے قبل اس کی تصدیق کو ہر حال میں یقینی بنائیں اور معلومات کے لیے صرف اور صرف سرکاری و مستند ذرائع پر انحصار کریں۔