اسرائیلی جیل میں معروف فلسطینی ڈاکٹر کی جان خطرے میں؟ انسانی حقوق کی تنظیم نے خطرناک دعویٰ کر دیا

اسرائیلی انسانی حقوق کی تنظیم ‘فزیشنز فار ہیومن رائٹس اسرائیل’ نے سنگین انتباہ جاری کرتے ہوئے کہا ہے کہ غزہ کے معروف فلسطینی معالج ڈاکٹر حسام ابو صفیہ کی صحت اسرائیلی قید میں تیزی سے بگڑ رہی ہے اور جیل میں ان کی جان کو شدید خطرات لاحق ہیں۔

انسانی حقوق کی تنظیم کے مطابق، شمالی غزہ کے کمال عدوان اسپتال کے ڈائریکٹر ڈاکٹر حسام ابو صفیہ کو حال ہی میں رملا جیل کے ایک زیرِ زمین تفتیشی مرکز منتقل کیا گیا تھا، جس کے بعد ان کی جسمانی حالت میں نمایاں خرابی دیکھی گئی۔ دو روز قبل ان کے وکیل ناصر عودہ نے جب جیل میں ان سے ملاقات کی، تو ڈاکٹر حسام کے سر، آنکھوں، کانوں اور گردن کے اطراف وحشیانہ تشدد کے واضح نشانات موجود تھے۔ وکیل کے مطابق، وہ انتہائی کمزور ہو چکے ہیں اور انہیں سانس لینے سمیت بات چیت کرنے میں بھی شدید دشواری کا سامنا ہے۔

ڈاکٹر حسام ابو صفیہ نے اپنے وکیل کو بتایا کہ قید کے دوران 4 سے 5 اسرائیلی اہلکار اچانک ان کی کوٹھڑی میں داخل ہوئے اور انہیں بے رحمی سے زدوکوب کیا۔ وکیل ناصر عودہ نے اس سے قبل بھی یہ انکشاف کیا تھا کہ ڈاکٹر حسام کو مسلسل ہتھکڑیاں لگا کر رکھا جاتا ہے اور کئی دائمی بیماریوں میں مبتلا ہونے کے باوجود انہیں صاف پینے کا پانی، مناسب خوراک اور ضروری طبی سہولیات سے محروم رکھا جا رہا ہے۔

واضح رہے کہ ڈاکٹر حسام ابو صفیہ کو اسرائیلی فوج نے 27 دسمبر 2024 کو کمال عدوان اسپتال پر حملے کے دوران طبی عملے اور مریضوں سمیت حراست میں لیا تھا۔ دوسری جانب، اسرائیلی حکام نے تشدد کے ان الزامات پر تاحال کوئی باضابطہ ردعمل ظاہر نہیں کیا، جبکہ عالمی و مقامی انسانی حقوق کی تنظیموں نے ڈاکٹر حسام کے فوری آزادانہ طبی معائنے اور انہیں مناسب طبی سہولیات کی فراہمی کا پرزور مطالبہ کیا ہے۔