آبنائے ہرمز ہی ایران کا جوہری ہتھیار ہے، نائب چیئرمین روسی سلامتی کونسل

روس کی سلامتی کونسل کے نائب چیئرمین اور سابق صدر دمتری میدویدیف نے کہا ہے کہ جنگ کے دوران آبنائے ہرمز نے ایران کو غیر معمولی تزویراتی (سٹریٹجک) برتری فراہم کی ہے، اور درحقیقت آبنائے ہرمز ہی ایران کا جوہری ہتھیار ہے۔

ایرانی خبر رساں ادارے ‘تسنیم’ سے خصوصی گفتگو کرتے ہوئے دمتری میدویدیف نے اس عزم کا اظہار کیا کہ امریکہ اور اسرائیل کے ساتھ کشیدگی اور جنگ کے بعد بھی ماسکو ایران کے ساتھ اپنی سٹریٹجک شراکت داری کو برقرار رکھنے اور اسے جاری رکھنے کے لیے مکمل تیار ہے۔

سابق روسی صدر نے یہ اہم بیان تہران میں دیا، جہاں وہ ایران کے شہید سپریم لیڈر آیت اللہ علی خامنہ ای کی نمازِ جنازہ اور تدفین کی رسومات میں شرکت کے لیے روسی وفد کی قیادت کر رہے ہیں۔

اس سے قبل اپنے ایک بیان میں دمتری میدویدیف نے ایرانی قوم کے حوصلے کی تعریف کرتے ہوئے کہا تھا کہ امریکہ کے خلاف جدوجہد میں ایرانی قوم بالآخر فاتح بن کر ابھرے گی اور وہ امریکہ یا کسی بھی دوسرے ملک کے دباؤ میں ہرگز نہیں آئے گی۔ انہوں نے مزید کہا کہ شہید ایرانی سپریم لیڈر آیت اللہ خامنہ ای کی شہادت پر روس بھی ایران کے دکھ میں برابر کا شریک ہے، اور اس عظیم شہادت نے ایرانی قوم کو پہلے سے زیادہ متحد کر دیا ہے۔

دورے کے دوران روسی وفد نے ایران کے صدر مسعود پزشکیان سے بھی ملاقات کی۔ اس موقع پر ایرانی صدر مسعود پزشکیان نے ایران اور روس کے درمیان ہونے والے سٹریٹجک معاہدوں پر عملدرآمد کے عمل کو مزید تیز کرنے پر زور دیا۔