ڈیرہ بگٹی : سیکیورٹی فورسز کا آپریشن، 5 دہشت گرد ہلاک،وزیراعظم کا فورسز کو خراج تحسین

ڈیرہ بگٹی میں سیکیورٹی فورسز نے خفیہ اطلاعات کی بنیاد پر کارروائی کرتے ہوئے بھارتی حمایت یافتہ دہشت گردوں کے خلاف آپریشن کیا۔ آئی ایس پی آر کے مطابق فائرنگ کے تبادلے میں 5 دہشت گرد مارے گئے جبکہ ان کے قبضے سے اسلحہ اور گولہ بارود بھی برآمد ہوا۔ ہلاک دہشت گرد متعدد دہشت گرد کارروائیوں میں ملوث تھے۔

وزیراعظم محمد شہباز شریف نے ڈیرہ بگٹی میں بھارتی حمایت یافتہ فتنہ الہندوستان کے دہشت گردوں کے خلاف کامیاب کارروائی پر سیکیورٹی فورسز کو خراجِ تحسین پیش کیا۔ وزیراعظم نے کہا کہ آپریشن میں 5 دہشت گردوں کی ہلاکت سیکیورٹی فورسز کی کارکردگی کا واضح ثبوت ہے۔

وزیراعظم نے کہا کہ عزمِ استحکام کے ویژن کے تحت سیکیورٹی فورسز دہشت گردی کے خلاف بڑی کامیابیاں حاصل کر رہی ہیں۔ دہشت گردی کے خلاف جنگ میں پوری قوم افواجِ پاکستان کے ساتھ کھڑی ہے۔

ان کا کہنا تھا کہ پوری قوم دہشت گردی کے خلاف متحد ہے اور ملک سے ہر قسم کی دہشت گردی کے مکمل خاتمے کے لیے پرعزم ہے۔