ضلع نوشکی میں امن و امان کی خراب صورتحال کے باعث 31 جولائی تک کرفیو نافذ

بلوچستان کے ضلع نوشکی میں امن و امان کی خراب صورتحال کے پیشِ نظر انتظامیہ کی جانب سے 31 جولائی تک کرفیو نافذ کر دیا گیا ہے۔ محکمہ داخلہ کی جانب سے جاری کردہ نوٹیفکیشن کے مطابق کرفیو رات 8 بجے سے لے کر 31 جولائی کی رات 8 بجے تک برقرار رہے گا۔ اس دوران ضلع نوشکی میں بغیر اجازت گھروں سے نکلنے اور کسی بھی قسم کی نقل و حرکت پر مکمل پابندی عائد ہوگی۔

نوٹیفکیشن میں مزید بتایا گیا ہے کہ کرفیو کے دوران عوامی اجتماعات، جلوسوں اور غیر ضروری سفر پر سخت پابندی ہوگی۔ تاہم ایمرجنسی اور ضروری خدمات کے لیے ڈپٹی کمشنر کو سرکاری ملازمین، میڈیکل، ریسکیو اور یوٹیلٹی عملے کو استثنیٰ دینے کا مجاز قرار دیا گیا ہے۔ انتظامیہ نے واضح کیا ہے کہ کرفیو کی خلاف ورزی کرنے والوں کے خلاف قانون کے مطابق سخت کارروائی عمل میں لائی جائے گی۔