کیوبا کی امریکی پابندیوں کے خاتمے کیلئے اقوام متحدہ کا اجلاس بلانے کی درخواست

کیوبا نے اپنے ملک پر عائد امریکی تجارتی اور اقتصادی پابندیوں کے خاتمے کے لیے اقوامِ متحدہ کی جنرل اسمبلی (UNGA) کا خصوصی اجلاس بلانے کی باضابطہ درخواست کر دی ہے۔

عالمی میڈیا کی رپورٹس کے مطابق، کیوبا کے وزیرِ خارجہ برونو روڈریگیز پارییا نے دارالحکومت ہوانا میں ایک اہم پریس کانفرنس کے دوران اس فیصلے کا اعلان کیا۔ انہوں نے بتایا کہ کیوبا کی جانب سے اقوامِ متحدہ کی جنرل اسمبلی کا یہ اجلاس 7 جولائی کو منعقد کرنے کی درخواست کی گئی ہے۔ ہم نے جنرل اسمبلی کا اجلاس طلب کرنے کی درخواست اس لیے کی ہے کیونکہ کیوبا کو امریکی حکومت کی جانب سے عائد طویل تجارتی اور اقتصادی پابندیوں کے باعث انتہائی مشکل اور سنگین صورتحال کا سامنا ہے۔ کیوبا امریکا کے لیے کوئی خطرہ نہیں ہے، بلکہ یہ پابندیاں خود ہمارے عوام کی فلاح و بہبود اور خطے کے امن کے لیے بڑا خطرہ ہیں جو بین الاقوامی قانون کے تمام اصولوں کی کھلی خلاف ورزی ہیں۔ کیوبا کے وزیرِ خارجہ نے اس امید اور اعتماد کا اظہار بھی کیا کہ جب یہ معاملہ اقوامِ متحدہ کے فورم پر اٹھایا جائے گا، تو بین الاقوامی برادری کا ایک بڑا حصہ کیوبا کے اصولی موقف کی بھرپور حمایت کرے گا اور امریکی پابندیوں کے خلاف آواز بلند کرے گا۔