فیلڈ مارشل عاصم منیر کا دورۂ ترکیہ، صدر اردوان سے ملاقات، دوطرفہ تعلقات، دفاعی تعاون پر گفتگو

پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف جنرل سید عاصم منیر نے برادر ملک ترکیہ کا اہم سرکاری دورہ کیا ہے، جس کا بنیادی مقصد دونوں ممالک کے درمیان اسٹریٹجک اور دفاعی تعلقات کو مزید مضبوط بنانا تھا۔ دورے کے دوران آرمی چیف نے ترک صدر رجب طیب اردوان سے ملاقات کی، جس میں دوطرفہ تعلقات، دفاعی تعاون، باہمی دلچسپی کے امور اور علاقائی سلامتی کی مجموعی صورتحال پر تفصیلی تبادلہ خیال کیا گیا۔ جنرل سید عاصم منیر نے ترک وزیر دفاع، ترک جنرل اسٹاف کے سربراہ اور دیگر اعلیٰ عسکری و سیاسی قیادت سے بھی ملاقاتیں کیں، جن میں دفاعی تعاون کو وسعت دینے کے عزم کا اعادہ کیا گیا۔ آئی ایس پی آر کے مطابق، ترک جنرل اسٹاف ہیڈکوارٹرز آمد پر آرمی چیف کو گارڈ آف آنر پیش کیا گیا، جبکہ پاک ترک دفاعی تعلقات کے فروغ میں نمایاں خدمات کے اعتراف میں جنرل عاصم منیر کو ترک مسلح افواج کے امتیازی خدمات کے تمغے سے بھی نوازا گیا۔