خواتین ترقی کی شراکت دار نہیں قیادت کا کردار ادا کریں: مریم نواز

وزیراعلیٰ پنجاب مریم نواز شریف نے وفاقی دارالحکومت میں منعقدہ نویں او آئی سی (OIC) منسٹیریل کانفرنس برائے خواتین سے خطاب کرتے ہوئے کہا ہے کہ خواتین کو بااختیار بنانا کسی ایک طبقے کا نہیں بلکہ پوری قوم کی ترقی کا معاملہ ہے، اس لیے خواتین کو ترقی کے سفر میں صرف شراکت دار نہیں بلکہ رہبر اور قائد کا کردار ادا کرنا چاہیے۔ انہوں نے کانفرنس میں شریک تمام مسلم ممالک کے نمائندگان کو خوش آمدید کہتے ہوئے کہا کہ پاکستان ایک پرامن ملک اور مہمان نواز لوگوں کی سرزمین ہے۔ انہوں نے واضح کیا کہ اسلام نے خواتین کو عزت، وقار اور تحفظ کے حقوق دیے ہیں، اور تعلیم، صحت و روزگار ان کی بنیادی ضرورتیں ہیں۔ مریم نواز نے برصغیر کی عظیم خواتین محترمہ فاطمہ جناح، کلثوم نواز اور مسلم دنیا کی پہلی خاتون وزیراعظم محترمہ بے نظیر بھٹو کی سیاسی و سماجی جدوجہد کو خراجِ تحسین پیش کرتے ہوئے کہا کہ ان شخصیات نے مشکل ترین حالات میں عزم و استقامت کی مثالیں قائم کیں اور آنے والی نسلوں کے لیے راستے آسان کیے۔

وزیراعلیٰ نے پنجاب حکومت کے اقدامات کا ذکر کرتے ہوئے بتایا کہ صوبے کے ہر ترقیاتی منصوبے میں خواتین کی کامیابی نمایاں ہے؛ اسکالرشپس اور لیپ ٹاپ اسکیموں میں لڑکیوں کا حصہ 60 فیصد سے زائد ہے، جبکہ “اپنی چھت، اپنا گھر” اور “ہونہار اسکالرشپ” جیسے پروگرامز کے ذریعے انہیں آگے بڑھنے کے مواقع مل رہے ہیں۔ انہوں نے مزید کہا کہ خواتین کو معاشی طور پر خودمختار بنانے کے لیے ای کامرس، آئی ٹی اسکلز، ٹیلرنگ، کوکنگ اور لائیوسٹاک کے شعبوں میں معاونت فراہم کی جا رہی ہے۔ خواتین کے تحفظ اور صحت کو اپنی اولین ترجیح قرار دیتے ہوئے مریم نواز کا کہنا تھا کہ فیلڈ ہسپتال، کلینک آن ویلز، سیف سٹی کیمرے، ورچوئل پولیس اسٹیشنز اور “پنک الیکٹرک ٹیکسی پروگرام” جیسے انقلابی اقدامات سے خواتین کو محفوظ ماحول اور روزگار فراہم کیا جا رہا ہے۔ آخر میں انہوں نے او آئی سی ممالک پر خواتین کی قیادت کے فروغ کے لیے مشترکہ کوششوں پر زور دیا اور شرکاء کو تاریخی شہر لاہور کے دورے کی دعوت بھی دی۔