پنک سالٹ ویلیو ایڈیشن فنانسنگ سکیم کا آغاز، پروسیسنگ زون قائم کرنے کا اعلان

وزیراعلیٰ پنجاب مریم نواز شریف نے صوبے میں پنک سالٹ (گلابی نمک) کی صنعت، برآمدات اور روزگار کے فروغ کے لیے ایک انقلابی اقدام اٹھاتے ہوئے “چیف منسٹر پنک سالٹ ویلیو ایڈیشن فنانسنگ اسکیم” کا باقاعدہ ڈیجیٹل افتتاح کر دیا ہے، جبکہ قائد آباد کے قریب 110 ایکڑ اراضی پر جدید پنک سالٹ منرل پراسیسنگ زون قائم کرنے کا بھی اعلان کیا گیا ہے۔ اس مجوزہ زون میں 200 سے زائد صنعتی یونٹس قائم کیے جائیں گے جہاں 150 ملین ڈالر کی سرمایہ کاری سے 10 ہزار افراد کو براہِ راست روزگار ملے گا۔ اسکیم کے تحت نئے سرمایہ کاروں کو پنک سالٹ کی پروسیسنگ، ریفائننگ اور پیکجنگ کے لیے 50 لاکھ سے 5 کروڑ روپے تک کے بلاسود قرضے 5 سال کی واپسی کی مدت پر فراہم کیے جائیں گے۔ حکام کے مطابق، ویلیو ایڈیشن کے ذریعے پاکستان سالانہ 300 ملین ڈالر تک کا زرمبادلہ کما سکے گا۔ تقریب سے خطاب کرتے ہوئے مریم نواز شریف نے مائنز اینڈ منرلز ڈیپارٹمنٹ میں لیزنگ کے ڈیجیٹل نظام کی تعریف کی اور عزم ظاہر کیا کہ قدرتی وسائل قوم کی امانت ہیں اور اب دنیا بھر میں بھیجے جانے والے پنک سالٹ پر صرف “میڈ ان پاکستان” ہی لکھا جائے گا۔