دہشتگردی کیخلاف جنگ فیصلہ کن مرحلے میں داخل ہو چکی: سرفراز بگٹی

وزیراعلیٰ بلوچستان میر سرفراز بگٹی امن و امان کی صورتحال کے باوجود بغیر بلٹ پروف گاڑی کے زیارت پہنچ گئے، جہاں انہوں نے دہشتگردی کے خلاف حکومتی عزم کا اعادہ کیا۔

زیارت میں میڈیا کے نمائندوں سے گفتگو کرتے ہوئے وزیراعلیٰ بلوچستان نے واضح کیا کہ ملک و صوبے میں دہشتگردی کے خلاف جاری جنگ اب ایک فیصلہ کن مرحلے میں داخل ہو چکی ہے اور حکومت کسی بھی صورت عوام کو اکیلا یا تنہا نہیں چھوڑے گی۔ انہوں نے کہا، “اگر کوئی بھی بلوچستانی مشکل میں ہوگا، تو میں خود اس کے پاس پہنچوں گا۔ حالات مشکل ضرور ہیں مگر حکومت اپنی ذمہ داریوں سے کبھی پیچھے نہیں ہٹے گی۔” ان کا مزید کہنا تھا کہ بلوچستان کے غیور عوام اب دہشتگردی کے خلاف متحد ہو کر کھڑے ہو چکے ہیں۔

سرفراز بگٹی نے فرائض کی انجام دہی کے دوران جامِ شہادت نوش کرنے والے پولیس اہلکاروں کو خراجِ تحسین پیش کرتے ہوئے کہا کہ پولیس کے بہادر جوانوں نے آخری سانس تک دہشتگردوں کا مقابلہ کیا۔ انہوں نے اعلان کیا کہ شہداء کی قربانیوں کو رائیگاں نہیں جانے دیا جائے گا اور ان کے بچوں کی تعلیم، کفالت اور مستقبل کی تمام تر ذمہ داری حکومتِ بلوچستان خود اٹھائے گی۔