پاکستان تاقیامت رہے گا، کسی کا باپ نہیں توڑ سکتا: وزیراعلیٰ بلوچستان

وزیراعلیٰ بلوچستان میر سرفراز بگٹی نے یومِ آزادی کے موقع پر پولو گراؤنڈ کوئٹہ میں ایک پروقار تقریب سے خطاب کرتے ہوئے عزم کا اظہار کیا ہے کہ پاکستان تاقیامت قائم و دائم رہے گا اور دنیا کی کوئی طاقت اسے نقصان نہیں پہنچا سکتی۔ تقریب سے خطاب کرتے ہوئے ان کا کہنا تھا کہ “ہم محب وطن پاکستانی تھے، محب وطن پاکستانی ہیں اور محب وطن پاکستانی رہیں گے، کسی کا باپ بھی پاکستان کو نہیں توڑ سکتا۔” انہوں نے بلوچستان کی ترقی اور امن و امان کی بحالی کے لیے مسلح افواج، ایف سی، پولیس اور سویلین شہداء کی عظیم قربانیوں کو خراجِ عقیدت پیش کیا۔

وزیراعلیٰ سرفراز بگٹی نے کہا کہ یہ آزاد وطن ہمارے اسلاف کی ان گنت قربانیوں کا نتیجہ ہے اور امن کے قیام کے لیے قربانیوں کا یہ سلسلہ آج بھی جاری ہے۔ انہوں نے کہا کہ بلوچستان کا پورا عوام شہداء کے غمزدہ لواحقین کے غم میں برابر کا شریک ہے اور سیکورٹی فورسز کے جذبے کو قدر کی نگاہ سے دیکھتا ہے۔ سرفراز بگٹی نے ریاست مخالف عناصر کو تنقید کا نشانہ بناتے ہوئے کہا کہ کچھ لوگ منفی پروپیگنڈے کے ذریعے بلوچستان کے نوجوانوں کو گمراہ کرنے کی کوشش کر رہے ہیں، لیکن اب صوبے کے باکمال نوجوان ان کے تمام مکر و فریب اور چالوں کو اچھی طرح سمجھ چکے ہیں۔