مزدوروں کے قاتل رعایت کے مستحق نہیں، سخت کارروائی ہوگی: وزیراعلیٰ بلوچستان

وزیراعلیٰ بلوچستان میر سرفراز بگٹی نے ضلع واشک کے علاقے ماشکیل میں نہتے اور بے گناہ مزدوروں کے بہیمانہ قتل کی شدید الفاظ میں مذمت کرتے ہوئے واضح کیا ہے کہ معصوم محنت کشوں کے قاتل کسی رعایت کے مستحق نہیں ہیں اور ان کے خلاف سخت ترین کارروائی عمل میں لائی جائے گی۔

اپنے ایک سخت ردعمل میں سرفراز بگٹی کا کہنا تھا کہ ماشکیل میں شہید ہونے والے صرف پنجابی مزدور نہیں تھے بلکہ وہ پاکستان کے معزز شہری، محنت کش اور ہمارے اپنے بھائی تھے۔ انہوں نے زور دے کر کہا کہ معصوم شہریوں پر یہ بزدلانہ حملہ کسی ایک صوبے یا قومیت پر نہیں بلکہ پاکستان کی وحدت، آئین اور ریاست پر حملہ ہے۔

وزیراعلیٰ بلوچستان نے دہشت گردوں کو آڑے ہاتھوں لیتے ہوئے کہا کہ آزادی کی نام نہاد تحریک کا لبادہ اوڑھنے والے دہشت گردوں نے نہتے اور پرامن مزدوروں کو نشانہ بنا کر اپنے مکروہ عزائم پوری دنیا کے سامنے بے نقاب کر دیے ہیں۔ ان کا مقصد کسی حق کی جدوجہد نہیں بلکہ صرف دہشت، نفرت، خونریزی پھیلانا اور پاکستان کو غیر مستحکم کرنا ہے۔ انہوں نے عزم ظاہر کیا کہ ریاست دشمن عناصر اور ان کے سہولت کاروں کو کسی صورت معاف نہیں کیا جائے گا اور پاکستانی شہریوں کے خون کے ہر قطرے کا حساب قانون کے مطابق لیا جائے گا۔