نیویارک میں محبوس وینزویلا کے سابق صدر کی اہلیہ کو ہارٹ اٹیک کا خدشہ

نیویارک: وینزویلا کے سابق صدر نکولس مادورو کی اہلیہ سیلیا فلورس نے دل کی تشویشناک حد تک بگڑتی ہوئی حالت کے باعث امریکی وفاقی عدالت سے اپنی قید کی سزا حراستی مرکز کے بجائے مین ہٹن میں گھر پر نظر بندی (ہاؤس اریسٹ) میں تبدیل کرنے کی التجا کر دی ہے۔

69 سالہ سیلیا فلورس کے قانون دانوں کی جانب سے عدالت میں دائر درخواست میں موقف اختیار کیا گیا ہے کہ جنوری میں وینزویلا میں امریکی فوجی کارروائی کے دوران حراست میں لیے جانے کے بعد سے جیل میں ان کی صحت مسلسل گر رہی ہے۔

طبی دستاویزات کے مطابق، گرفتاری سے قبل انہیں دل کے والو کے عارضے (Mitral Valve Prolapse) کی صرف ماہانہ بنیادوں پر ایک انجیکشن کے ذریعے دیکھ بھال کی ضرورت ہوتی تھی۔ تاہم، اب وہ متعدد پیچیدہ ادویات استعمال کر رہی ہیں، جن میں اسپرین، اسٹیٹن، ڈلٹیا زیم اور نائٹروگلسرین شامل ہیں۔

وکلا کا کہنا ہے کہ بیرونی ماہرینِ امراضِ قلب کے جائزے سے ظاہر ہوتا ہے کہ سیلیا فلورس دورانِ حراست معمولی نوعیت کے ہارٹ اٹیک (Milder Heart Attack) سے بھی گزر چکی ہیں۔ ڈاکٹروں نے ان کے دل کا ایک خاص طریقہ علاج تجویز کیا ہے جس کے بعد مستقبل میں اوپن ہارٹ سرجری کا امکان بھی مسترد نہیں کیا جا سکتا، جبکہ فیڈرل جیل کا ماحول ایسی نازک صورتحال میں بحالیِ صحت کے لیے کسی صورت موزوں نہیں ہے۔

عدالت کو دی گئی تجویز کے مطابق، سیلیا فلورس کو مین ہٹن میں ایک مخصوص رہائش گاہ پر 24 گھنٹے مسلح سیکیورٹی اور الیکٹرانک و ویڈیو نگرانی کے سخت نظام کے تحت رکھا جائے۔ مجوزہ شقوں کے مطابق ان سے ملنے والے تمام افراد کو عدالت اور وفاقی پروڈکشن سے پیشگی منظوری لینا ہوگی جبکہ ان کی فون کالز بھی ریکارڈ کی جائیں گی۔

واضح رہے کہ سیلیا فلورس اور نکولس مادورو دونوں اس وقت نیویارک میں زیرِ حراست ہیں جہاں امریکی صدر ڈونلڈ ٹرمپ کی انتظامیہ کی جانب سے ان پر منشیات کی اسمگلنگ اور غیر قانونی ہتھیار رکھنے کی سنگین فردِ جرم عائد کی گئی ہے۔ دونوں رہنماؤں نے ان الزامات کی سختی سے تردید کرتے ہوئے خود کو بے قصور قرار دیا ہے، جبکہ مقدمے کی باقاعدہ سماعت آئندہ برس جون کے لیے طے کی گئی ہے۔

امریکی وفاقی جج ایلون کے ہیلرسٹین نے فی الحال سیلیا فلورس کی گھر میں منتقل کرنے کی اس ہنگامی درخواست پر اپنا فیصلہ محفوظ کر رکھا ہے۔