چین اور سعودیہ کے وزرائے خارجہ کی ملاقات، امریکا ایران مفاہمتی یادداشت پر تبادلہ خیال

چین کے دارالحکومت بیجنگ میں چینی وزیر خارجہ وانگ یی اور سعودی عرب کے وزیر خارجہ شہزادہ فیصل بن فرحان کے درمیان ایک اہم اور سٹریٹجک ملاقات ہوئی ہے، جس میں امریکا اور ایران کے درمیان حالیہ مفاہمتی یادداشت (MoU) سمیت مشرقِ وسطیٰ کی مجموعی صورتحال پر تفصیلی تبادلہ خیال کیا گیا۔

اس موقع پر گفتگو کرتے ہوئے چینی وزیر خارجہ وانگ یی نے خطے کی صورتحال پر تشویش کا اظہار کرتے ہوئے کہا کہ امریکا اور ایران کے درمیان مذاکرات کا تسلسل اور جلد کسی جامع معاہدے تک پہنچنا خطے کے وسیع تر امن کے لیے ناگزیر ہے۔ انہوں نے دونوں ممالک کے درمیان مفاہمتی یادداشت پر فوری عملدرآمد کی ضرورت پر زور دیتے ہوئے واضح کیا کہ موجودہ جنگ بندی کی صورتحال زیادہ تسلی بخش نہیں ہے، اس لیے مستقل حل تلاش کرنا ہوگا۔ ان کا کہنا تھا کہ جنگ کے مقابلے میں ہمیشہ مذاکرات اور تصادم کے بجائے بامقصد مکالمہ ہی بہترین راستہ ہے۔ چین اس سلسلے میں سعودی عرب کے ساتھ مل کر خطے میں کشیدگی کم کرنے اور پائیدار امن کے قیام کے لیے اپنا تعمیری کردار ادا کرنے کو تیار ہے۔ ملاقات کے دوران سعودی وزیر خارجہ شہزادہ فیصل بن فرحان نے بین الاقوامی فورمز پر چین کے موقف کی تائید کرتے ہوئے کہا کہ ریاض بیجنگ کی ‘ون چائنا پالیسی’ (One China Policy) کی بھرپور حمایت کرتا ہے۔ انہوں نے خطے میں چین کے بڑھتے ہوئے سفارتی کردار کو سراہتے ہوئے کہا کہ سعودی عرب چین کے ساتھ اپنے دوطرفہ تزویراتی و معاشی تعلقات کو مزید فروغ دینے کا شدید خواہاں ہے اور وہ بیجنگ کے ساتھ مل کر علاقائی امن و استحکام کے لیے تعاون کو مزید مضبوط بنانا چاہتا ہے۔

واضح رہے کہ سعودی وزیر خارجہ شہزادہ فیصل بن فرحان ان دنوں دو روزہ اہم سرکاری دورے پر چین میں موجود ہیں، جہاں ان کی دیگر اعلیٰ چینی قیادت سے بھی ملاقاتیں متوقع ہیں۔