چین کا ایران اور امریکا کے درمیان جنگ بندی برقرار رکھنے کا مطالبہ

چین نے مشرقِ وسطیٰ میں حالیہ کشیدگی کے بعد ایران اور امریکہ کے درمیان جنگ بندی کو برقرار رکھنے پر زور دیا ہے۔ اقوامِ متحدہ کی سلامتی کونسل (UNSC) کے ہنگامی اجلاس سے خطاب کرتے ہوئے چین کے نائب مستقل مندوب سن لی نے کہا کہ دونوں ممالک کے مابین جنگ بندی کو برقرار رکھنا انتہائی ضروری ہے، کیونکہ دونوں فریقین نے ’اسلام آباد مفاہمتی یادداشت‘ (Islamabad MoU) پر دستخط کر رکھے ہیں۔ چینی مندوب نے یاد دہانی کرائی کہ اس تاریخی یادداشت کے تحت امریکہ اور ایران نے ایک دوسرے کی خود مختاری اور علاقائی سالمیت کے احترام کا باقاعدہ عہد کیا تھا، لہٰذا اب دونوں ممالک کو اس معاہدے کی پاسداری کرنی چاہیے۔ سن لی نے مزید کہا کہ ایران پر عائد یکطرفہ اقتصادی پابندیاں ختم ہونی چاہییں اور عالمی سطح پر درست و غلط کے واضح اصولوں کو برقرار رکھنا ناگزیر ہے۔ ان کا کہنا تھا کہ ایران جوہری ہتھیار تیار نہ کرنے کے اپنے عزم پر قائم رہے،

تاہم تہران کو پُرامن مقاصد کے لیے جوہری توانائی حاصل کرنے کا پورا حق حاصل ہے۔ انہوں نے واضح کیا کہ چین مسائل کے پرامن حل کے لیے ہمیشہ ایک غیر جانبدار اور مستقل موقف پر قائم ہے اور بیجنگ اس تنازع کے سفارتی حل کے لیے اپنا تعمیری کردار ادا کرنے کے لیے پرعزم ہے۔