چین نے تاجکستان کے سرحدی علاقے میں اپنے شہریوں کو فوری انخلا کی ہدایت دے دی، حفاظت کے لیے ہنگامی الرٹ جاری

چین نے تاجکستان میں اپنے شہریوں کو افغانستان کے ساتھ سرحدی علاقے سے فوری انخلا کرنے کی ہدایت جاری کر دی ہے۔ چینی سفارت خانے نے پیر کے روز سکیورٹی الرٹ میں کہا کہ تاجکستان اور افغانستان کے سرحدی علاقے میں صورتحال کشیدہ ہے اور شہریوں کو محتاط رہنے کی ضرورت ہے۔

چینی میڈیا کے مطابق اتوار کی شام افغانستان کے صوبہ بدخشاں سے چار مسلح افغان افراد غیر قانونی طور پر تاجکستان کے خاتلون علاقے میں داخل ہوئے، جنہیں تاجک سرحدی فورسز نے ہلاک کر دیا۔

سفارت خانے نے تاجکستان میں موجود چینی کمپنیوں اور شہریوں پر زور دیا کہ وہ حفاظتی اقدامات مضبوط کریں، سرحدی علاقوں کی نگرانی کریں اور جلد از جلد علاقے سے انخلا کریں۔ شہریوں کو ہدایت کی گئی ہے کہ وہ تاجکستان اور افغانستان کی سرحدی علاقوں کا سفر کرنے سے گریز کریں۔

یاد رہے کہ 26 نومبر 2025 کو خاتلون ضلع شمس الدین شوہین میں حملے میں تین چینی شہری ہلاک اور ایک زخمی ہوا تھا، جبکہ 30 نومبر کو اسی علاقے میں ایک اور مسلح حملے میں بھی چینی شہری متاثر ہوئے تھے۔ ان واقعات کے بعد سفارت خانے نے سکیورٹی الرٹ جاری کیا تھا۔