چینی نائب صدر کی سعودی وزیر خارجہ سے ملاقات، جامع سٹریٹجک شراکت داری کا عزم

چین کے نائب صدر ہان ژینگ نے بیجنگ میں سعودی عرب کے وزیر خارجہ شہزادہ فیصل بن فرحان آل سعود سے اہم ملاقات کی، جس میں دونوں ممالک کے مابین جامع سٹریٹجک شراکت داری کے عزم کا اعادہ کیا گیا۔

عالمی میڈیا رپورٹس کے مطابق ملاقات کے دوران چینی نائب صدر ہان ژینگ نے کہا کہ دونوں ممالک کی اعلیٰ قیادت کی بہترین سٹریٹجک رہنمائی کے باعث حالیہ برسوں میں چین اور سعودی عرب کے تعلقات مسلسل مثبت سمت میں آگے بڑھے ہیں۔ انہوں نے اس بات پر روشنی ڈالی کہ رواں سال دونوں ممالک کے مابین جامع سٹریٹجک شراکت داری کے قیام کی دسویں سالگرہ منائی جا رہی ہے۔

چینی نائب صدر کا کہنا تھا کہ چین، سعودی عرب کے ساتھ مل کر دونوں ممالک کے رہنماؤں کے درمیان طے پانے والے اہم اتفاقِ رائے پر عمل درآمد، سیاسی باہمی اعتماد کو مضبوط بنانے اور اعلیٰ سطح کے روابط کو وسعت دینے کا خواہاں ہے۔ انہوں نے مزید کہا کہ ‘گلوبل ساؤتھ’ کے اہم ارکان ہونے کے ناطے چین اور سعودی عرب کو باہمی رابطوں اور ہم آہنگی کو مزید فروغ دینا چاہئے تاکہ خطے اور دنیا میں امن و استحکام کو یقینی بنایا جا سکے۔

اس موقع پر سعودی وزیر خارجہ شہزادہ فیصل بن فرحان آل سعود نے چینی قیادت کا شکریہ ادا کرتے ہوئے کہا کہ سعودی عرب اور چین کے مابین جامع سٹریٹجک شراکت داری اس وقت اپنی تاریخ کی بلند ترین سطح پر پہنچ چکی ہے۔

انہوں نے واضح الفاظ میں اعادہ کیا کہ سعودی عرب ’’ایک چین‘‘ (One China) پالیسی پر مضبوطی سے قائم ہے اور بیجنگ کے ساتھ دوطرفہ تعلقات کو مزید فروغ دینے کے لئے پوری طرح تیار ہے۔ سعودی وزیر خارجہ کا کہنا تھا کہ دونوں ممالک کو کثیرالجہتی شعبوں میں تعاون بڑھانا چاہیے اور مل کر دنیا بھر میں امن و استحکام کے لیے اپنا مثبت کردار ادا کرنا چاہئے۔