دریائے چناب میں سیلاب، تریموں ہیڈ پر پانی کی سطح بلند، چنیوٹ میں نہر میں شگاف سے فصلیں زیر آب

دریائے چناب میں سیلابی صورتحال کے باعث تریموں ہیڈ ورکس پر پانی کی آمد 1,48,650 کیوسک اور اخراج 1,36,050 کیوسک ریکارڈ کیا گیا ہے، جبکہ محکمہ آبپاشی نے آئندہ 24 گھنٹوں میں پانی کے بہاؤ میں مزید اضافے کا خدشہ ظاہر کیا ہے۔ دوسری جانب چنیوٹ میں جھنگ روڈ بائی پاس کے قریب سیم نہر میں 50 فٹ چوڑا شگاف پڑنے سے متعدد ایکڑ پر کھڑی فصلیں زیرِ آب آ گئی ہیں۔ ترجمان پی ڈی ایم اے (PDMA) کے مطابق مون سون بارشوں سے پنجاب کے دریاؤں میں پانی کے بہاؤ میں اضافہ ہوا ہے اور اس وقت دریائے سندھ میں تربیلا کے مقام پر 3,42,000 کیوسک، کالاباغ میں 3,09,000 کیوسک اور چشمہ کے مقام پر 2,93,000 کیوسک کے ساتھ نچلے درجے کا سیلاب ہے۔