چیئرمین واپڈا کا تربیلا 5ویں توسیعی منصوبے کے سائٹ کا دورہ: واقعے کی فوری انکوائری کا حکم، مرکزی ڈیم محفوظ قرار

واپڈا کے چیئرمین لیفٹیننٹ جنرل محمد سعید نے تربیلا پانچویں توسیعی منصوبے کے سائٹ کا ہنگامی دورہ کر کے صورتحال کا تفصیلی جائزہ لیا اور انٹیک اسٹرکچر، ٹنل اور پاور ہاؤس کا معائنہ کیا۔ پروجیکٹ پر پیش آنے والے حادثے کی وجوہات کا احاطہ کرتے ہوئے انہوں نے واقعے کی فوری محکمانہ انکوائری کا حکم دیا اور تفصیلی رپورٹ بلا تاخیر جمع کرانے کی ہدایت کی۔ واپڈا حکام نے واضح کیا کہ تربیلا ڈیم کی مرکزی ساخت اور تمام اہم تنصیبات مکمل طور پر محفوظ ہیں اور انہیں فی الحال کوئی خطرہ نہیں ہے۔ چیئرمین واپڈا نے تاخیر کو کم کرنے کے لیے ہنگامی منصوبہ تیار کرنے اور اصلاحی اقدامات فوری شروع کرنے کی ہدایت جاری کی، جس پر کنسلٹنٹس اور ٹھیکیداروں نے بھی اتفاق کیا۔ واضح رہے کہ عالمی بینک اور اے آئی آئی بی (AIIB) کے تعاون سے ٹنل 5 پر زیرِ تعمیر یہ منصوبہ 1530 میگاواٹ کی پیداواری صلاحیت رکھتا ہے۔