عمان کے جنوب مشرقی ساحلی علاقے میں کارگو جہاز پر پروجیکٹائل حملہ

مشرقِ وسطیٰ کی سمندری حدود میں کشیدگی کے ایک نئے واقعے میں عمان کے جنوب مشرقی ساحلی علاقے کے قریب ایک تجارتی کارگو جہاز کو پروجیکٹائل (میزائل یا ڈرون) حملے کا نشانہ بنایا گیا ہے۔

برطانوی میری ٹائم ٹریڈ آپریشنز (UKMTO) کی جانب سے جاری کردہ رپورٹ کے مطابق، یہ حملہ عمان کے ساحل سے تقریباً ساڑھے سات ناٹیکل میل کی دوری پر بین الاقوامی بحری گزرگاہ میں انجام دیا گیا۔ ابتدائی اطلاعات کے مطابق، اس حملے کے نتیجے میں کارگو جہاز کے اگلے حصے (Bow) کو نقصان پہنچا ہے، تاہم کسی جانی نقصان یا جہاز میں آگ لگنے کی فوری اطلاع موصول نہیں ہوئی۔دوسری جانب، سمندری سیکیورٹی کی اس بگڑتی ہوئی صورتحال کے درمیان ایک برطانوی اخبار نے سنسنی خیز دعویٰ کیا ہے کہ ایران نے تزویراتی طور پر اہم تجارتی گزرگاہ ‘آبنائے ہرمز’ (Strait of Hormuz) سے اچانک 4 آئل ٹینکروں کو آگے بڑھنے سے روک کر واپس بھیج دیا ہے۔رپورٹ میں بتایا گیا ہے کہ ان آئل ٹینکروں نے ممکنہ طور پر ایرانی پاسدارانِ انقلاب فورس (IRGC) کی سخت ہدایات یا وارننگ کے بعد اپنا طے شدہ راستہ تبدیل کیا۔ خطے میں کارگو جہاز پر حملے اور دوسری طرف آئل ٹینکروں کا راستہ بدلے جانے کے ان واقعات نے بحرِ ہند اور خلیج کے خطے میں بین الاقوامی تجارتی بحری جہازوں کی سیکیورٹی سے متعلق شدید خدشات پیدا کر دیے ہیں۔