کینیڈین وزیر خارجہ انیتا آنند آج سرکاری دورے پر پاکستان پہنچیں گی

کینیڈا کی وزیر خارجہ انیتا آنند آج  ایک اہم سرکاری دورے پر پاکستان پہنچیں گی۔ ترجمان دفتر خارجہ کے مطابق، کینیڈین وزیر خارجہ یہ دورہ پاکستان کے نائب وزیر اعظم اور وزیر خارجہ اسحاق ڈار کی خصوصی دعوت پر کر رہی ہیں۔ وزارتِ خارجہ کا منصب سنبھالنے کے بعد انیتا آنند کا یہ پاکستان کا پہلا باضابطہ دورہ ہوگا، جس کے دوران دونوں ممالک کے وزرائے خارجہ کے مابین اعلیٰ سطح کے دوطرفہ مذاکرات ہوں گے۔ ان مذاکرات میں پاک-کینیڈا تعلقات کے تمام پہلوؤں کا احاطہ کیا جائے گا، جبکہ تجارت، سرمایہ کاری، تعلیم اور عوامی روابط (پبلک ٹو پبلک کانٹیکٹ) کے شعبوں میں تعاون کو فروغ دینے پر خصوصی توجہ مرکوز رہے گی۔ اپنے قیام کے دوران کینیڈین وزیر خارجہ پاکستان کی اعلیٰ قیادت سے بھی اہم ملاقاتیں کریں گی، جہاں باہمی دلچسپی کے علاقائی و عالمی امور پر تفصیلی تبادلہ خیال کیا جائے گا۔ ترجمان کا مزید کہنا تھا کہ پاکستان اور کینیڈا کے مابین ہمیشہ سے خوشگوار دوطرفہ تعلقات قائم رہے ہیں اور یہ دورہ دونوں ممالک کے درمیان تعاون کو مزید مضبوط بنانے کے مشترکہ عزم کا عکاس ہے۔