فیلڈ مارشل سے کینیڈین وزیر خارجہ کی ملاقات، دوطرفہ تعاون بڑھانے پر اتفاق

کینیڈا کی وزیر خارجہ انیتا آنند نے جنرل ہیڈکوارٹرز (جی ایچ کیو) راولپنڈی کا دورہ کیا جہاں انہوں نے چیف آف آرمی اسٹاف سے ملاقات کی۔ پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران باہمی دلچسپی کے امور، علاقائی سلامتی اور دوطرفہ سیکورٹی روابط کو وسعت دینے پر تفصیلی تبادلہ خیال کیا گیا۔ آرمی چیف نے عالمی امن اور علاقائی استحکام کے لیے پاکستان کے موئقف کو اجاگر کرتے ہوئے دہشت گردی اور مشترکہ سیکورٹی چیلنجز سے نمٹنے کے لیے باہمی تعاون پر زور دیا۔ اس موقع پر کینیڈین وزیر خارجہ نے دہشت گردی کے خلاف جنگ میں پاکستان کی مسلسل قربانیوں اور خطے میں امن و استحکام کے لیے تعمیری کردار کی بھرپور تعریف کی۔ دونوں رہنماؤں نے دفاعی و سیکورٹی شعبوں میں مشترکہ روابط کو مزید مضبوط بنانے کے عزم کا اعادہ کیا۔