سعودیہ اور کینیڈا کی آبنائے ہرمز میں تجارتی جہازوں پر حملوں کی مذمت

کینیڈا اور سعودی عرب نے آبنائے ہرمز میں تجارتی جہازوں پر ہونے والے حملوں کی سخت الفاظ میں مذمت کرتے ہوئے انہیں عالمی امن اور معیشت کے لیے سنگین خطرہ قرار دیا ہے۔ سعودی عرب کے شہر جدہ میں کینیڈین وزیر اعظم مارک کارنے اور سعودی ولی عہد شہزادہ محمد بن سلمان کے درمیان ایک اہم ملاقات ہوئی، جس کے بعد جاری کردہ مشترکہ اعلامیے میں واضح کیا گیا کہ تجارتی بحری جہازوں کو نشانہ بنانا عالمی جہاز رانی، توانائی کی بلاتعطل ترسیل اور بین الاقوامی قوانین کی کھلی خلاف ورزی ہے۔ اعلامیے میں متنبہ کیا گیا کہ ان حملوں سے خطے میں کشیدگی بڑھے گی اور جاری سفارتی کوششوں کو شدید نقصان پہنچے گا، اس لیے تمام فریقین پر زور دیا گیا کہ وہ آبنائے ہرمز میں محفوظ اور بلا رکاوٹ جہاز رانی کو یقینی بنائیں۔ علاوہ ازیں، کینیڈا اور سعودی عرب نے امریکہ اور ایران کے مابین جاری کشیدگی کو کم کرنے اور کسی ممکنہ معاہدے تک پہنچنے کے لیے پاکستان اور قطر کی جانب سے کی جانے والی مصالحتی و سفارتی کوششوں کو بھی زبردست طریقے سے سراہا ہے۔