وزیراعظم شہباز شریف اور اسحاق ڈار کو ملنے والے سرکاری تحائف کی تفصیلات جاری کر دی گئیں

کابینہ ڈویژن نے اپریل سے جون 2026 کے دوران وزیراعظم شہباز شریف، نائب وزیراعظم و وزیر خارجہ اسحاق ڈار اور دیگر سرکاری حکام کو بیرون ملک سے موصول ہونے والے سرکاری تحائف کی تفصیلات باضابطہ طور پر جاری کر دی ہیں۔

کابینہ ڈویژن کے مطابق، وزیراعظم شہباز شریف کو ملنے والے تمام سرکاری تحائف توشہ خانہ قوانین و ضوابط کے مطابق کابینہ ڈویژن میں جمع کروا دیے گئے ہیں۔ وزیراعظم کو مختلف غیر ملکی شخصیات اور وفود کی جانب سے ملنے والے تحائف میں شوگر باؤل، گاڑی کا فریم شدہ ماڈل، شیلڈز، قلم، کف لنکس، اور ٹائی وغیرہ شامل ہیں۔ اس کے علاوہ انہیں ایرانی دستکاری، چینی اسکرول پینٹنگ اور چائنا اسپیس اسٹیشن کا ماڈل بھی بطور تحفہ پیش کیا گیا۔

نائب وزیراعظم و وزیر خارجہ اسحاق ڈار کو ملنے والے تحائف میں مصری مجسمے، مسجد نبوی ﷺ کا خوبصورت ماڈل اور کف لنکس شامل ہیں۔ جبکہ ڈپٹی چیف آف پروٹوکول محمد ارسلان میر کو ڈائمنڈ کلیکشن کی ایک اعلیٰ معیار کی رِسٹ واچ موصول ہوئی۔

کابینہ ڈویژن کے حکام کا کہنا ہے کہ تمام موصول شدہ تحائف کی مالیاتی تخمینہ کاری (ویلیوایشن) کا عمل جاری ہے، جس کی مکمل ہوتے ہی توشہ خانہ قواعد و ضوابط کے مطابق مزید قانونی کارروائی عمل میں لائی جائے گی۔