بشری بی بی کی بیٹی کی جیل انتظامیہ کیخلاف سیشن کورٹ میں درخواست دائر

سابق خاتونِ اول بشریٰ بی بی کی صاحبزادی مبشرہ شیخ نے جیل انتظامیہ کے مبینہ ناروا سلوک کے خلاف سیشن کورٹ میں درخواست دائر کر دی ہے، جس پر عدالت نے پراسیکیوشن سے جواب طلب کر لیا ہے۔ فیصل ملک ایڈوکیٹ کے ذریعے دائر کردہ درخواست پر سماعت کرتے ہوئے ایڈیشنل ڈسٹرکٹ اینڈ سیشن جج خرم سلیم نے پراسیکیوشن کو نوٹسز جاری کرتے ہوئے 16 جولائی تک جواب جمع کرانے کا حکم دیا ہے۔ درخواست میں جیل اہلکار مریم پر غفلت، بدسلوکی اور غیر انسانی رویے کے سنگین الزامات عائد کیے گئے ہیں۔ موقف اپنایا گیا ہے کہ بشریٰ بی بی نے آنکھ میں شدید تکلیف کی کئی بار شکایت کی، مگر جیل انتظامیہ نے بروقت توجہ نہیں دی، جس کے باعث بیماری بگڑ گئی اور انہیں ہنگامی طور پر آنکھ کی سرجری کروانا پڑی۔ درخواست میں استدعا کی گئی ہے کہ متعلقہ خاتون اہلکار کا رویہ مسلسل نامناسب، توہین آمیز اور غیر پیشہ ورانہ رہا ہے، جس پر کارروائی کی جائے۔