طویل احتجاج کے بعد بلغاریہ کے وزیراعظم مستعفی

صوفیہ: بلغاریہ میں کئی ہفتوں سے جاری حکومت مخالف احتجاج کے بعد وزیراعظم روزن زیلیازکوو نے استعفیٰ دے دیا۔ جمعرات کو ان کے خلاف تحریکِ عدم اعتماد پر ووٹنگ ہونا تھی، تاہم وزیراعظم نے ووٹنگ سے قبل ہی اپنا عہدہ چھوڑنے کا فیصلہ کر لیا۔

خبر ایجنسی کے مطابق ملک میں معاشی پالیسیوں اور بڑھتی کرپشن کے خلاف احتجاج مسلسل شدت اختیار کر رہا تھا۔ مظاہرین کا مؤقف تھا کہ حکومت ٹیکسوں میں اضافہ کرکے کرپشن کو چھپانے کی کوشش کر رہی ہے۔

وزیراعظم زیلیازکوو کا کہنا تھا کہ انہیں یقین تھا کہ تحریک عدم اعتماد کامیاب نہیں ہوگی، تاہم حکومت کا اصل دارومدار عوامی اعتماد پر ہے۔ ’’جب عوام سڑکوں پر نکل آئیں تو ان کی آواز سننا ہماری پہلی ذمہ داری ہے۔‘‘