برازیل میں 2ہیلی کاپٹر فضا میں ٹکرا گئے، 6 افراد جان کی بازی ہار گئے

ریو ڈی جنیرو: برازیل کے شہر ریو ڈی جنیرو میں دو ہیلی کاپٹر فضا میں آپس میں ٹکرا گئے، جس کے نتیجے میں 6 افراد ہلاک ہوگئے۔

برازیلی ذرائع ابلاغ کے مطابق حادثہ اُس وقت پیش آیا جب دونوں ہیلی کاپٹر پرواز کے دوران ایک دوسرے سے ٹکرا گئے۔ تصادم کے بعد ایک ہیلی کاپٹر قریبی گاڑیوں کی پارکنگ میں جا گرا، جس سے وہاں آگ بھڑک اٹھی۔

حکام کا کہنا ہے کہ حادثے کے باعث پارکنگ میں موجود کم از کم 20 گاڑیاں جل کر تباہ ہوگئیں۔ امدادی ٹیمیں فوری طور پر موقع پر پہنچ گئیں اور آگ پر قابو پانے کے لیے کارروائیاں شروع کر دیں۔

رپورٹس کے مطابق ہیلی کاپٹروں میں سوار تمام 6 افراد جان کی بازی ہار گئے۔ برازیلی حکام نے واقعے کی تحقیقات کا آغاز کر دیا ہے تاکہ حادثے کی وجوہات کا تعین کیا جا سکے۔