ملک بھر میں بوہری برادری آج عید الفطر مذہبی جوش و جذبے سے منا رہی ہے

کراچی: ملک بھر میں مقیم بوہری برادری آج مذہبی جوش و جذبے اور روایتی عقیدت کے ساتھ عید الفطر منا رہی ہے۔ اس سلسلے میں کراچی سمیت مختلف شہروں میں نمازِ عید کے بڑے اجتماعات منعقد ہوئے۔

عید الفطر کا سب سے بڑا اجتماع کراچی کے علاقے صدر میں واقع طاہری مسجد میں ہوا، جہاں بوہری جماعت سے تعلق رکھنے والے ہزاروں افراد نے نماز ادا کی۔ اس کے علاوہ پان منڈی، سولجر بازار، بلوچ کالونی اور حیدری کی مساجد میں بھی نمازِ عید کے اجتماعات منعقد کیے گئے۔ نماز کے اختتام پر ملک و قوم کی بقا، سلامتی اور امن و امان کے لیے خصوصی دعائیں مانگی گئیں۔

نماز کی ادائیگی کے بعد برادری کے افراد نے ایک دوسرے کو عید کی مبارکباد دی اور گلے مل کر خوشیوں کا تبادلہ کیا۔ کسی بھی ناخوشگوار واقعے سے نمٹنے کے لیے مساجد اور عید گاہوں کے باہر سکیورٹی کے انتہائی سخت انتظامات کیے گئے تھے، جبکہ پولیس اور دیگر قانون نافذ کرنے والے اداروں کے اہلکار تعینات رہے۔